LAJMPRESS: Mexhiti, Arifi, Ostreni dhe Bejta, të besuarit e Ahmetit

Mexhiti, Arifi, Ostreni dhe Bejta, të besuarit e Ahmetit
================================================================================
lajm gazeta on 28/12/2009 08:47:00
 
Izet Mexhiti, Teuta Arifi, Gëzim Ostreni dhe Nevzat Bejta janë nënkryetarët
e rinj të Bashkimit Demokratik për Integrim (BDI). Ata u zgjodhën në këto
poste në mbledhjen e Këshillit të përgjithshëm të BDI-së që u mbajt të
dielën. Në të njëjtën mbledhje Abdylaqim Ademi është zgjedhur sekretar i
përgjithshëm i partisë, kurse Hazbi Lika, sekretar organizativ, funksion i ri
në këtë parti. Të dielën u zgjodhën edhe 21 anëtarët e kryesisë
qendrore të partisë, ku prej emrave të më të njohur nuk gjenden
nënkryetari i deritanishëm Rafiz Haliti, deputeti Xhevat Ademi, si dhe
funksionari i deritanishëm i lartë, Fazli Veliu. Zgjedhje e nënkryetarëve,
sekretarëve dhe anëtarëve të kryesisë qendrore është bërë me propozim
të kryetarit të partisë Ali Ahmeti. Burime partiake thonë se i revoltuar nga
pretendimet e hapura për të marrë ndonjë post nënkryetari ose sekretari
partiak, kryetari i BDI-së Ali Ahmeti nuk i ka propozuar Rafiz Halitin dhe
Xhevat Ademin as për anëtarë të kryesisë qendrore, kurse për të qetësuar
situatën ka “sakrifikuar” edhe dajën e tij Fazli Veliu. Emra të rinj në
radhët e kryesisë qendrore të BDI-së janë Atila Rexhepi dhe Fatmir Besimi,
kurse pas katër viteve në kryesinë qendrore është kthyer edhe Nazmi Beqiri.