LAJMPRESS: FNDLNJ e shqetësuar nga emigrimi masiv i shqiptarëve

FNDLNJ e shqetësuar nga emigrimi masiv i shqiptarëve
================================================================================
lajm gazeta on 24/02/2010 12:54:00
 
Forumi Ndërkombëtar për të Drejtat dhe Liritë e Njeriut në Maqedoni
(FNDLNJ), me  seli në Kumanovë, shpreh shqetësimin e thellë me valën e
madhe të shpërnguljeve  të popullatës shqiptare, sidomos nga rajoni i
Kumanovës dhe  Likovës.
“Ky fluks i madh i familjeve shqiptare për  emigruar jashtë, është edhe
një sinjal i qartë për partitë në pushtet, sidomos  asaj shqiptare –
BDI-së, se ka pakënaqësi të madhe nga mënyra e politikbërjes.  Tani e
nëntë vite pas luftës së 2001-shit, rajoni i Likovës dhe Kumanovës ende 
po i shëron plagët e asaj lufte, shumica e ish-luftëtarëve të UÇK-së
mbetën të  pasistemuar, kurse përgjithësisht rajoni mbeti shumë mbrapa në
aspekt të  zhvillimit ekonomik. Kjo prapambeturi zhvillimore e këtyre rajoneve
shqiptare,  nxitë rininë tonë që në mënyrë kaq masive të marrin rrugët
e kurbetit nëpër  Evropë”, thuhet në reagimin e FNDLNJ-së.
FNDLNJ gjithashtu vlerëson se shumica e atyre që  kanë marrë rrugën e
kurbetit, kanë rënë nën ndikimin e manipulimeve të ndryshme,  me ose pa
qëllime, nga ana e përfaqësuesve të agjencive turistike. Për FNDLNJ më  i
dhimbshëm është fakti se në këto emigrime po shpërngulen familje të tëra
të  reja shqiptare, me gra e fëmijë, të cilëve për një kohë shumë të
shkurtër u  kanoset edhe asimilimi gjuhësor dhe kombëtar.
“Andaj, kërkojmë nga popullata shqiptare që të mos  marrin këto hapa të
pamatur dhe të treten nëpër Evropë, sikur dikur në  Turqi”.
FNDLNJ kërkon nga pushteti aktual në Maqedoni, që  urgjentisht të
përgatitë plane emergjente investuese nëpër rajonet shqiptare,  para së
gjithash në rajonin e Likovës e Kumanovës, në mënyrë që të parandalohet 
emigrimi i popullatës së re dhe e njëjta të ketë kushte dhe mundësi të
jetës  normale në Maqedoni.