LAJMPRESS: Autobusë të shkatërruar në fshatrat shqiptare

Autobusë të shkatërruar në fshatrat shqiptare
================================================================================
lajm gazeta on 17/03/2010 08:45:00
 
Banorë nga fshatrat e ndryshëm shqiptare të rrethinës së Shkupit ankohen se
kanë probleme të mëdha me transportin urban pasi autobusët më të cilët
udhëtojnë janë tepër të vjetër. Shpeshherë ndodhë që autobusët të
prishen dhe për orë të tëra udhëtimi i fshatarëve të bllokohet. Problem
më i madh sipas tyre është te nxënësit të cilët i humbin orët e mësimit
për shkak të problemeve të tilla teknike. “Çdo ditë ndodhë që autobusi
të prishet për shkak se janë të vjetër dhe ne nxënësit që udhëtojmë
çdo ditë për në shkollë vonohemi për në mësim. Ditën e hënë gjatë
rrugës për në Lubeten autobusi kishte pasur ndërprerje edhe atë tre herë
gjatë asaj rruge, kurse të martën në mëngjes nuk ka pasur autobusë”, tha
Afërdita Emini nga Lubeteni. Problemet e tilla i pohojnë edhe nga NPK
“Skopje”. “Problemi nuk është vetëm në Lubeten, pasi me të njëjtin
problem ballafaqohen edhe fshatrat tjerë si Kopanica, Haraçina dhe Batinca”,
tha përgjegjësi në këtë ndërmarrje, Eshref Iseni. Ai pohoi se problemi nuk
qëndron në faktin se autobusët janë të vjetër, por ndonjëherë ndodh që
vozitësit me qëllim mundohen që shqiptarëve t’ju shkaktojnë dëme.
“Shoferët me qëllim bëhen sikur autobusi është prishur që shqiptarët
të zbresin dhe të mbesin askund. Së shpejti do të ketë edhe autobusë të
rinj me ç’rast udhëtarët të mos kenë probleme të tilla”, tha Iseni.
Edhe përkundër kësaj gjendje të mjerueshme me autobusët nga kjo ndërmarrje
kanë paralajmëruar se do të vendosin wairless internet nëpër autobusë, me
qëllim që udhëtarët të kenë qasje të lirë edhe gjatë udhëtimit.