LAJMPRESS: Athinë, një shqiptar i vrarë dhe dy policë të plagosur

Athinë, një shqiptar i vrarë dhe dy policë të plagosur
================================================================================
lajm gazeta on 17/02/2010 10:08:00
 
Në një aksion të policisë në departamentin Virona të Athinës për
arrestimin e dy keqbërësve mbeti i vrarë një qytetar shqiptar dhe u 
plagosën dy policë. Sipas policisë, viktima, një 25 vjeçar dhe baba i një
fëmije që punonte si hidraulik në pallatin përbri, u plagos për  vdekje nga
shkëmbimi i zjarrit mes policisë dhe dy keqbërësve që hodhën edhe 5
granata. “Për fat të keq gjatë shkëmbimit të zjarrit me keqbërësit
humbi jetën një bashkëqytetari ynë” deklaroi zëdhënësi i policisë
greke, e cila ndërkohë e vlerësoi operacionin si “të suksesshëm
përderisa u arrestuan dy keqbërësit”. I pari ra në duart e policisë i
plagosur kurse i dyti u arrestua pak më vonë i ndjekur nga forcat e rendit.
Pistoleta e përdorur prej tyre ishte ajo e rrëmbyer një natë më parë në
sulmin e tyre kundër një patrulle policore, të cilën edhe e kishin
çarmatosur. Dy keqbërësit e arrestuar janë të burgosur shqiptarë, që
vuanin dënimin për vjedhje bankash në burgun e Larisës nga ishin larguar me
leje muaj më parë. Opozita reagoi me kritika të ashpra për efektivitetin e
policisë dhe kërkoi ndryshimin e modelit të aplikuar në “mbrojtje të
qytetarit”. /dw/