Shqiptarët kanë fituar hisen e tyre në Shkup

Këshilltari në qytetin e Shkupit, Qemal Musliu ka folur për “Lajm” rreth aktiviteteve të fundit që ndodhin me shqiptarët e Shkupit. Ai gjithashtu ka treguar edhe për projektet të cilat do të kryhen gjatë vitit 2010.

LAJM:Si është përfaqësimi i shqiptarëve në qytetin e Shkupit?

Musliu: Pas zgjedhjeve lokale Bashkimi Demokratik për Integrim (BDI) në Këshillin e qytetit të Shkupit përfaqësohet me tetë këshilltarë dhe mendojmë që ne grupi i tetë anëtarëve të këshilltarëve, jemi te obliguar dhe po bëjmë çmos që të realizojmë politikën dhe platformën e BDI-së, për çështjet që i pengojnë qytetarët e qytetit të Shkupit. Sa për fillim mund të them që ne si BDI në koalicion me VMRO-DPMNE bëmë një pazar të mirë. Për herë të parë në qytetin e Shkupit, morëm dy drejtorë të ndërmarrjeve publike edhe atë drejtorin e ndërmarrjes publike higjiena komunale, Rakip Doçi dhe drejtorin e energjetikës, Bekim Rexhepi.

LAJM: A i keni marrë të gjitha premtimet nga marrëveshja me VMRO-në?

Musliu: Shqiptar është edhe kryetari i Këshillit Drejtues në ndërmarrjen publike për komunikacion, si dhe në ndërmarrjen publike në rrugica. Do të kemi edhe kryetarë të këshillave drejtues për parqe dhe ujësjellës. Sa i përket aspektit të institucioneve kulturore, do të kemi edhe drejtorin për qendrën informative kulturore. Drejtor do të kemi edhe në shtëpinë për kulturë “Koço Racin”. Së shpejti, deri në fund të muajit pritet që në Qendrën Informative Kulturore, të zë vendin e saj drejtoresha që do të propozohet nga BDI dhe së bashku me anëtarët që i kemi dhënë në këshillat drejtues drejt institucioneve kulturore, edhe në këtë lëmi ne si shqiptarë, ne si parti do të mund të kyçemi në realizimin e zhvillimit të kulturës shqiptare këtu në Shkup.

LAJM: Kultura shqiptare duket mjaft e shtypur...

Musliu: për herë të parë në aspekt kulturor ne si BDI jemi kyç dhe do ta marrim rolin e kryetarit të këshillit drejtues në kryesinë e Qytetit të Shkupit. Shumë shpejt do të zgjidhet kandidati ynë për kryetar të këshillit drejtues në Qytetin e Shkupit, Skender Asani dhe presim nga ky person me njohuritë e veta që ka të hulumton, të gjinden shumë njohuri, elemente kulturore shqiptare që ndoshta janë ndoshta tani për tani të mbyllura nëpër podrumet e këtij vendi,e gjithë kjo do të jetë në interes të zhvillimit kulturor për gjithë qytetarët shqiptarë në Shkup. Gjithashtu, ne me aktivitetet tona që kemi bë në qytetin e Shkupit, kemi propozuar shumë projekte kulturore të cilat kanë konkurruar në konkursin e qytetit të Shkupit. Deri më tani dihet se në qytet kanë kaluar në sektorin e kulturës, jo një numër i madh i projekteve shqiptare, vendosëm që diku 20 deri në 28 projekte shqiptare, respektivisht me mjete materiale të kalojnë për aq sa është e paraparë në buxhet të qytetit të Shkupit.

LAJM: Shkollat shqipe kanë pasur mjaft probleme. A do të vazhdojnë ata sërish?

Musliu: Ne si këshilltarë kemi bë vitin e kaluar një iniciativë për ndërtimin e një objekti të ri shkollor, për shkollim në drejtimin e mjekësisë dhe kjo si iniciativë është dërguar deri në Ministrinë për Arsim dhe Shkencë. Kemi informatë kthyese se do të bëhet një analizë e përpiktë në lidhje me kërkesat reale për ndërtimin e këtij objekti. Ma merr mendja se në të ardhmen ky problem, i cili ishte një ndër problemet më kryesore për nxënësit shqiptarë nga vitet e kaluara dhe dalëngadalë ky problem duhet të zgjidhet.

LAJM: A do të bëhen investime në vendbanimet shqiptare?

Musliu: Mund të them që edhe në fund të vitit me buxhetin janë paraparë shumë projekte të cilat përveç tjerash janë në interes të shqiptarëve me propozimin e BDI u kyçëm edhe në disa projekte të tjera siç janë ndërtimi i rrjetit atmosferik në Karposh dhe kyçja për rrjete, është i paraparë dhe ka kaluar në buxhet të qytetit të Shkupit edhe projekti për kyçjen në rezervuar në lagjen e Gazi Babës të komunës Çair, projekt për shtimin e ujit në fshatin Radushë, ndërtimin e urës në Saraj, për arsye se ura e vjetër është shumë e vjetër, sepse ajo urë lidh shumë fshatra të komunës së Sarajit.

LAJM: Gjuha shqipe nuk po respektohet ashtu siç është paraparë. Çfarë do të bëhet në këtë aspekt?

Musliu: Ka kaluar propozimi për udhërrëfyes në tre gjuhë në gjithë lokalitetin e qytetit të Shkupit. Po ashtu mund të them se kanë kaluar edhe disa propozime për projektet tona në buxhetin e vitit 2010, që është sjellja e 12 kamionëve special për higjienën publike komunale të Shkupit, si dhe në bazë të kërkesave tona të këshilltarëve të BDI-së janë pranuar edhe disa asfaltime të rrugëve të disa lagjeve, si në lagjen Vizbeg dhe në lagje tjera të cilat do të bëhen në bashkëpunim më kryetarët përkatës të këtyre komunave. Ma merr mendja se ne si grup i këshilltarëve, do ta zbusim situatën e problemeve që kanë shqiptarët në shumë lëmi, në shumë sfera të qytetit të Shkupit dhe mendojmë se po ia dalim, mirëpo afati ishte shumë i shkurtë deri në vitin e ri dhe këto projekte që i përmenda duhet të realizohen në të ardhmen.