Clinton në turne diplomatik në rajon për Iranin

Ajo ka shkuar në Gjirin Persik për të kërkuar mbështetjen arabe për sanksione më të ashpra ndaj Iranit.

Zonja Clinton e prezanton këtë qëndrim në Forumin vjetor në Katar, SHBA - Bota Islamike, përpara se të shkojë në Arabinë Saudite.

Këshilltarët kanë sugjeruar se sauditëve do t'u kërkohet që të sigurojnë Kinën se do të mbushin mungesat në furnizimet me naftë, nëse Pekini mbështet sanksione më të ashpra ndaj Iranit.

Mbështetje për sanksione

Në Katar zonja Clinton takohet edhe me kryeministrin e Turqisë, Recep Tayip Erdogan për t'i kërkuar që Turqia t'i japë fund kundërshtimit ndaj sanksioneve.

Pjesë e turneut të saj është edhe angazhimi për të vepruar në mbështetje me fjalimin e madh për botën arabe, që presidenti Obama mbajti në Kajro vitin e kaluar.

Por qëllimi më specifik është për të kërkuar mbështetje për më shumë sanksione kundër ambicieve bërthamore të Iranit.

Kjo u bë e qartë nga një zyrtar i Departamentit të Shtetit, Jeffrey Feltman.

Duke folur për planin e zonjës Clinton ai tha se disa vende të Gjirit Persik do të kenë mundësi të përdorin influencën e tyre me partnerët tregtarë për të ushtruar presion ndaj Iranit.

"Arabia Saudite për shembull, ka një marrëdhënie shumë të rëndësishme tregtare me Kinën."

"Mendoj se keni parë, - nëse ndiqni lajmet, - që ka patur vizita të ndërsjellta mes Lindjes së Mesme dhe Kinës."

"Ne do të mund të presim që ata t'i përdorin këto vizita, t'i përdorin këto marrëdhënie, një një mënyrë që ndihmon në rritjen e presionit që Irani mund të ndjejë".

"Ne duam që Irani të llogaris se ku shtrihen interesat e tij, në një mënyrë që Irani të vijë në anën e respektimit të kërkesave ndërkombëtare lidhur me programin e tij bërthamor," tha zoti Feltman. /bbc/