Greqia përballet me masa të reja financiare

Ndër masat e reja është ngrirja e pensioneve, ulja e rrogave të nëpunësve të administratës dhe shtimi i disa taksave.

Pensionistët në Athinë kanë protestuar kundër masave të reja. Ndërsa presidenti i Komisionit Evropian, Hose Manuel Barroso, i vlerësoi këto masa, duke thënë se ato janë të rëndësishme për stabilitetin e të gjithë eurozonës. Greqia duhet të ulë defiçitin për të shlyer urgjentisht një pjesë të borxhit në muajin prill.

Kryeministri George Papandreou e krahasoi krizën e buxhetit të cilën po përjeton vendi me situatën e një kohe lufte dhe tha se Greqia ishte në prag të falimentimit.

Bashkimi Evropian i ka bërë presion Athinës që të marë masa shtrënguese shtesë për të përmirësuar gjendjen e financave.

Sindikatat kanë zhvilluar greva kundër planeve të qeverisë dhe ministri i ekonomisë ka paralajmëruar që këto masa të jenë të drejta nga ana sociale.

Ton 'alarmant'

"E gjejmë veten në një situatë lufte, të përballur me skenarë negativë për vendin," i tha grupit të tij parlamentar në prag të takimit z. Papandreou.

Ai shtoi se Greqisë i duhej të shmangte falimentimin, skenarin në të cilin shteti nuk do të ishte në gjendje të paguante rrogat dhe pensionet.

Korrespondentët thonë se z. Papandreou gjatë muajve të fundit ka përdorur tone dramatikë për të përshkruar problemet financiare të vendit, por ky i fundit ishte më alarmanti. /bbc/