Kur Serbia njeh doganat, ajo njeh edhe kufijtë e Kosovës

“Kur Serbia njeh doganat, njeh edhe kufijtë e Kosovës” i ka thënë Radio Dukagjinit zëvendëskryeministri i Kosovës Hajredin Kuçi, duke komentuar deklaratën e drejtorit për Zgjerim të BE-së, Pierre Mirel se Serbia duhet të pranojë pikat doganore të Kosovës. Edhe drejtori i doganave Naim Huruglica pohon se me njohjen e doganave në mënyrë të tërthortë njihet edhe shteti.

Dy ditë pas shpalljes së pavarësisë, pikat doganore në veri të vendit janë djegur dhe që nga ajo kohë, serbët e veriut të dirigjuar nga Beogradi nuk lejojnë që ato nuk mbikëqyren nga doganat e Kosovës.

Duke pasur parasysh këtë moskontroll, askush nuk di se çfarë hyn dhe del nga ajo pjesë e vendit. Kjo ka bërë që Qeveria e Kosovës ta quaj veriun ”Çerdhe të krimit”.

Për ta parandaluar këtë, Komisioni Evropian i ka kërkuar Serbisë përmes drejtorit për Zgjerim të BE-së, Pierre Mirel që të pranoj pikat doganore të Kosovës. Kjo kërkesë është mirëpritur nga institucionet e Kosovës.

Zëvendëskryeministri Hajredin Kuqi ka deklaruar se kur njihen doganat indirekt njihet edhe shteti i Kosovës. “Në momentin që i njeh doganat, njeh kufijtë në kuptimin juridiko-formal dhe unë besoj që mbi bazën e asaj është një hap i dukshëm në njohjen reciproke në radhë të parë të tërësisë territoriale të njeri-tjetrit dhe besoj që me kohë edhe të vet shteteve sovrane”, ka deklaruar Kuçi.

Të njëjtin mendim ndanë edhe drejtori i doganave të Kosovës, Naim Huruglica. “Doganat paraqesin një ndër elementet më të fuqishme sovrane të një shteti dhe në rastin konkret pranimi ose thjesht funksionalizimi i të gjitha pikave është shenjë e fuqishme e asaj që quhet mëvetësi ose pavarësi e një vendi”, ka thënë ai.

Drejtori për Zgjerim i BE-së për Ballkanin Perëndimor, Pierre Mirel ka deklaruar në Beograd se Bashkimi Evropian pret nga Serbia që të zhvillojë marrëdhënie të mira fqinjësore me Kosovën.