Tre personat e vetëvrarë në Skoci nuk janë kosovarë

Tre persona që të dielën kanë bërë vetëvrasje në Skoci nuk janë kosovarë, e konfirmoi të hënën ambasadori i Kosovës në Londër, Muhamet Hamiti.

Ai tha se autoritetet britanike kanë konfirmuar se tre personat nuk janë kosovarë, duke demantuar kështu një lajm të transmetuar nga AFP.

"Autoritete zyrtare britanike e konfirmojnë zyrtarisht se njerëzit, për të cilët është dyshuar se ishin shtetas të Kosovës dhe kishin bërë vetëvrasje dje, nuk janë shtetas të Kosovës”, ka sqaruar Hamiti.

“Ambasada e Kosovës është përpjekur që nga momenti i parë të marrë vesh apo edhe të konstatojë vërtetësinë e lajmit, sepse ishte shqetësuese kur në lajme doli se ata persona ishin shtetas të Kosovës", tha ambasadori Hamiti për Radio Kosovën, duke u shprehur i lumtur që nuk bëhet fjalë për shtetas të Kosovës. /rtk/

Skoci: Vetëvriten 3 shqiptarë nga Kosova pasi ju refuzohet azili

Tre shqiptarë shtetas të Kosovës, dyshohet se kanë vdekur në Skoci, pasi janë hedhur nga pallati për shkak të refuzimit të kërkesës për azil, bën të ditur gazeta prestigjioze "The Guardian".

Në shkrimin e saj gazeta thekson se viktimat janë dy meshkuj dhe një femër. Sipas gazetës, ata ishin lidhur me njëri-tjetrin, duke u hedhur së bashku nga kati i 15-të i një ndërtese në qytetin e Gllasgout mbrëmjen e së shtunës.

Trupat e viktimave janë gjetur mëngjesin e së dielës në një kompleks ndërtesash. Ende nuk dihet identiteti i viktimave, dhe lajmi nuk është publikuar zyrtarisht nga autoritetet.

Megjithatë, “The Guardian” citon një dëshmitare, e cila jetonte në një banesë përballë viktimave. Sipas saj, “pasi kam hapur perdet e dritareve, pashë trupat e tyre të shtrirë në tokë”. “Menjëherë i telefonova policisë”, vijon ajo.

Dyshohet se tre personat kanë bërë një pakt së bashku për të kryer një vrasje kolektive. /bota sot/telegrafi/