Serbia të gjejë një model bashkëpunimi me Kosovën

Nga Serbia nuk kërkohet që ajo të njohë pavarësinë e Kosovës, mirëpo Beogradi duhet të vendosë një model të bashkëpunimit me Prishtinën, ka deklaruar ambasadori i Britanisë së Madhe në Beograd, Stephen Wordsworth.

Një lloj i bashkëpunimit, sikurse ai mes dy Gjermanive të pasluftës - apo edhe modeli i që kanë arritur Irlanda dhe Irlanda Veriore, sipas ambasadorit britanik, është i mundur.

Wordsworth po ashtu ka thënë se, përkundër faktit që BE-ja nuk do të kërkojë nga Beogradi zyrtar që të njohë pavarësinë e Kosovës, gjatë procesit të anëtarësimit do të kërkohet të përcaktojë se çka e përbën Serbinë në kuptimin fizik, respektivisht, cila është madhësia e saj dhe numri i popullsisë.

Sa i përket mendimit këshillëdhënës të Gjykatës Ndërkombëtare të Drejtësisë lidhur me ligjshmërinë e shpalljes së pavarësisë së Kosovës, Wordsworth në një intervistë për televizionin B92, ka thënë se ky vendim (mendim) nuk do të jetë 100% në favor të njërës apo tjetrës palë, por sipas tij, pritet të jetë një zgjidhje e mesme. /Telegrafi/