Pacolli: Swaziland njeh pavarësinë e Kosovës

Në një konferencë të mbajtur të enjten, Presidenti i AKR-së Behgjet Pacolli, prezantoinjohjen e Republikës së Kosovës nga shteti jugafrikan Swaziland.

Sipas tij, kjo njohje erdhi pas shumë takimeve që ai kishte zhvilluar me ministrin e Jashtëm te këtij shteti F.M. Lutfo Ephraim Dlamini dhe shume personalitete te tjera të Mbretërisë së Swazilandit. Pacolli ka deklaruar se atij i është thënë nga ministri Ephraim Dlamini se nota verbale e njohjes nga Swazilandi do të arrijë në Kosovë të hënën.

Në të njëjtën kohë, Presidenti i AKR-së ka kritikuar Ministrinë e Punëve të Jashtme për mungesë të strategjisë për lobim, duke vlerësuar ngecje ne procesin e njohjes pasi që këtë vit vendi ynë është njohur nga vetëm një shtet.

Pacolli po ashtu shfaqi letrën për njohje edhe nga Guineja e Re. AKR kishte paralajmëruar këtë njohje në muajin dhjetor, pasi kishte pranuar një letër zyrtare ku thuhej se edhe ministri i Jashtëm i Kosovës është njoftuar për këtë njohje që i vjen Kosovës.

Pacolli kërkoi përgjegjësi nga Ministria e Jashtme e Kosovës për këtë njohje, derisa kërkoi sqarime për mosveprim dhe moskrijim të marrëdhënieve diplomatike me këtë shtet.

Kreu i AKR-së tha se asnjëherë nuk ka ndalur fushatën e tij të lobimit duke deklaruar se e ka intensifikuar këtë fushatë, veçanërisht në Afrikë dhe se së shpejti Kosovën do ta njohin edhe tri vende të tjera.

Pacolli vlerësoi se do të mund të tregonte me kompetencë të plotë se cilat janë këto vende, por për hir të korrektësisë, publikimi do të bëhet në momentin e njohjes së Kosovës nga këto shtete.

Swazilandi është një shtet i vogël jugafrikan, jo më shumë se 200 kilometra në veri dhe 130 kilometra në perëndim. Sipas statistikave të vitit 2009, ky shtet ka afro 1.2 milionë banorë. /Telegrafi/