Kodra e diellit tuboi studiuesit e Kulturës

Nxitja e diskutimeve mbi rolin e kulturës në mjediset urbane duke vënë theksin në industritë kulturore si potencial për zhvillimin e komunave dhe hulumtimi I kapaciteteve kulturore, ishte tema e punëtorisë tre ditore në Kodrën e Diellit, nën organizim të Qendrës për arte "Multimedia"-Shkup dhe Teatri Oda-Prishtinë. Gjatë kësaj punëtorie rreth tridhjetë pjesëmarrës, përfaqësues nga komunat e Kosovës dhe Maqedonisë kanë përcaktuar hartën e burimeve kulturore dhe të industrive kulturore të cilat paraqesin identitetin kulturorë të qyteteve. Në cilësinë e nikoqirit, punëtorinë e ka përshëndetur udhëheqësi i Sektorit për Veprimtari Publike, Iljaz Halimi, i cili theksoi se komuna e Tetovës do t’i përkrah në vazhdimësi këto iniciativa që kanë për qëllim nxitjen e aktiviteteve kulturore. Koordinator për komunën e Tetovës për këtë projekt është Vullnet Zenki. Gjatë kësaj punëtorie pjesëmarrësit në mënyrë praktike kanë trajtuar resurset kulturore të qyteteve në veçanti si një potencial i mundshëm për zhvillimin e turizmit dhe zhvillimin ekonomik të komunave. Përfaqësuesit e komunave nga Maqedonia e Kosova gjatë kësaj punëtorie vizituan edhe monumentet kulturore, teqenë Arabati Baba, Xhaminë e Pashës dhe Galerinë e Arteve në Tetovë.