Rezart Galica ekspozitë në Shkup

Ekspozita multimediale e prezantuar nga Rrezeart Galica u hap të shtunën në teatrin shqiptar në Shkup dhe do të zgjasë shtatë ditë. Kjo ekspozitë së pari u ekspozua në Prishtinë më 23 shtator në galerinë e ministrisë se kulturës pasi që ishte edhe e financuar nga ajo. Sipas Rrezeart Galicës kjo ekspozitë ka karakter ndërkombëtar prandaj u ekspozua në Shkup dhe pritet që e njëjta të ekspozohet edhe në Tiranë. "Ekspozita ime multimediale është me karakter ndërkombëtar prandaj do të prezantohet në tre shtete si dhe mund të vizitohet nga të gjithë, këtë e ceki pasi që nuk isha i kënaqur nga numri i vizitorëve në Shkup, pasi që interesimi ishte shumë i dobët, kurse në Prishtinë ishte e kundërta, kishte numër të madh të vizitorëve, por shpresojmë që do të arrihet kjo gjë edhe në Shkup në ditët në vijim", tha Rrezeart Galica. Hapja e kësaj ekspozite u bë nga akademiku Shyqëri Limani ku tha se kjo ekspozitë prezanton punën disa vjeçare të artistit të ri Rrezeart Galica. "Ai gjithnjë është preokupuar me dizajnin dhe me disa disiplina të këtij spektrit të gjerë i cili është një kategori shoqërore shumë e rëndësishme, pra me logot dhe simbolet e ndryshme si dhe me posterin i cili është i rëndësishëm në komunikimin vizuel bashkëkohor, pastaj merret me performansat grafike të cilat nuk janë të stilit klasik por atij bashkëkohor , të grafikës digjitale e cila në mbar botën është primare dhe e adhuruar nga gjeneratat e reja të cilat shumë mirë e njohin elektronikën e cila po e pushton planetin tonë", tha akademiku Limani. Kjo ekspozitë ishte e ndarë në dy cikle mjaft interesante dhe profesionale ku cikli i parë do të mund të quhej art i revoltës ndërsa i dyti art i punuar më ç’lirshëm.