Edhe nga Maqedonia në mesin e të arrestuarve në protestat e VETËVENDOSJES

 Bleron Azizi nga Kërçova ka qenë në mesin e personave të arrestuar nga policia kosovare gjatë protestës së ditës së shtunë të lëvizjes Vetëvendosja, njoftoi kryetari i shoqatës Ilyricum Libertas, Valon Kurtishi, shoqatë e cila ka përkrahur protestën. 

“Ai është mbajtur gjashtë orë në arrest dhe më pas është liruar”, tha për “Lajm”, Kurtishi.

Në bllokadat e Vetëvendoesjes ka pasur edhe dhjetëra të rinj tjerë shqiptarë nga Maqedonia, mirëpo asnjëri prej tyre nuk është në mesin e të lënduarve.

Ndërkaq në Maqedoni me tone të ndryshme janë komentuar protestat e ditës së shtunë të lëvizjes Vetëvendosja, të cilat përfunduan me dhunë. Sipas zëdhënësit të Bashkimit Demokratik për Integrim Bujar Osmani duhet të respektohet e drejta demokratike për protesta, por ato nuk duhet të jenë të dhunshme. posaçërisht në këto momente të rëndësishme për etablimin e shetëformësisë së Kosovës.

”BDI e përkrah politikën institucionale të Republikës së Kosovës në rrugën drejt shtetëformësisë, duke përfshirë këtu edhe bisedimet për çështjet teknike që po zhvillohen me Serbinë fqinje më ndërmjetësimin e komunitetit ndërkombëtarë.
Demonstratat dhe protestat janë e drejtë demokratike e qytetarëve, por ato nuk duhet të jenë të dhunshme dhe nuk duhet të jenë në funksion të dëmtimit të procesit të shtetëformësisë, etablimit ndërkombëtarë dhe imazhit të Kosovës si shtet i ri dhe serioz në rajon”, tha, zëdhënësi i BDI-së Bujar Osmani.

Më e ashpër në reagimin e saj ka qenë Rilindja Demokratike Kombëtare (RDK). Deputeti Izet Zeqiri vlerëson se organet kosovare kanë shpejtuar me ultimatumin e tyre që për pesë minuta, aktivistët e VETËVENDOSJES të largohen.

“Këto akte të dhunës janë të papranueshme pasi organizatorët e protestës dhanë mesazh të qartë se është protestë paqësore, gjë me të cilën ata thirreshin në Parlamentin e Kosovës. Bllokimi i rrugës afër Merdares më shumë është bërë për motive ekonomike se sa politike. Gazi lotëjsellës dhe balonat e ujit në këtë dimër të ftohtë ndaj protestës së qetë është i papranueshëm, sepse ata kanë lejuar kalimin e mallrave kosovare, ndërsa kanë bllokuar kalimin e mallrave nga Serbia”, tha deputeti Zeqiri.

Edhe shoqata joqeveritare Illyricum Libertas ka dënuar fuqishëm intervenimin i Shërbimit Policor të Kosovës ndaj protestuesve.

“Duke qenë një protestë paqësore, si dhe në një vijë me vendimin e Kuvendit të Republikës së Kosovës për reciprocitet të plotë politik dhe ekonomik me Republikën e Sërbisë, protesta nuk ka si të jetë antiligjore apo e dhunshme. Arrestimi i deputetëve të zgjedhur me votën e lirë popullore përbën nga ana tjetër një shkelje të rëndë të vullnetit qytetar si dhe sulm të drejtpërdrejtë ndaj institucionit të demokracisë parlamentare. VETËVENDOSJA dhe populli i Kosovës e shprehën sot më shumë se kurrë vendosmërinë e tyre për të mos lejuar cenimin e sovranitetit të Republikës së Kosovës si dhe respektin maksimal për sundimin e ligjit në vend”, deklaroi kryetari I kësaj shoqate Valon Kurtishi, duke kërkuar nga SHPK “që të lirojë urgjentisht deputetët dhe aktivistët e arrestuar”.

Protestat e ardhshme më 22 janar

“Protesta e ardhshme paqësore në bllokim të mallrave dhe automjeteve të Serbisë do të mbahet të dielën tjetër, me 22 janar 2012. Nëse Qeveria e Kosovës nis me zbatimin e reciprocitetit të plotë me Serbinë gjatë kësaj jave, natyrisht që nuk do ta mbajmë protestën e ardhshme me 22 janar”, thuhet në këtë njoftim.