Në DAP aktualisht 12 për qind janë shqiptarë

Zëvendësdrejtori i përgjithshëm në Drejtorinë për të Ardhura Publike (DAP), Alajdin Zeqiri ka mohuar se në konkursin e fundit të  kësaj Drejtorie kanë marrë vendime vetëm 5 shqiptarë. “Realiteti është se në DAP nga 27 pëlqime që ka lëshuar ministria e financave,  10 vendime u takojnë shqiptarëve ndërsa 17 maqedonasve. Prej tyre 7 vendime për shqiptarë janë  në drejtorinë rajonale te Shkupit, ndërsa deri më 19 mars do të marrin pëlqim edhe tre shqiptarë, nëpunës tatimorë në drejtorinë tatimore në Tetovë”, tha Zeqiri. Ai gjithashtu ka theksuar se në këtë institucion përqindja e shqiptarëve është progresive dhe gjerë në fund të vitit 2008 ka qenë vetëm 6 për qind. “Aktualisht kjo rritje është në trend pozitiv me 12 për qind, kjo në mënyrë kumulative do të vazhdojë që sipas projeksioneve tona deri në fund të vitit 2010 do te arrihet përqindja e duhur 25%. Kështu në bazë të Kushtetutës do të arrihet avancimi i duhur në këtë institucion”, tha Alajdin Zeqiri, zëvendësdrejtor në DAP.