Maqedonasit vjedhin 1,57 milionë euro

Ka filluar procesi gjyqësor ndaj dy shtetasve maqedonas të cilët akuzohen për manipulim më kartela të rreme bankare. Me ndihmën e pajisjeve për të depërtuar në verifikimin e të dhënave dhe qasjen në tastierat e bankomateve Zoran Z. dhe Kiril D., kanë zbuluar të dhënat e mbi 780 klientëve. Me falsifikimin e kartelave, ata kanë plaçkitur më shumë se një milion euro. Sipas akuzës, ata ngarkohen të kenë plaçkitur rreth 1,57 milionë euro dhe ky është një rekord i plaçkitjeve deri më tani. Metoda e këtillë tashmë nuk është sekret i madh në Gjermani. Shumica e bandave nga Evropa Juglindore, sulmojnë në mënyrë sistematike kartelat e klientëve gjermanë. Nëpër bankomate, ata vendosin një pajisje në formë të skanerit ngjitës, i cili ashtu bukur është i maskuar sa që klientët mendojnë se ajo është një pjesë e bankomatit. Edhe dy shtetasit maqedonas kishin punuar me një metodë të tillë. Më së tepërmi, ata kanë manipuluar nëpër filialet e Reisebank, HypoVereinsbank si dhe Stadtsparkasse, ndërsa jashtë vendit ata kanë vepruar edhe në Greqi, Itali, Bullgari dhe Maqedoni, derisa nëpër kontot e klientëve të zgjedhur nuk kishte mbetur më asnjë cent. Kiril D. dhe Zoran Z. u arrestuan pas një urdhërarresti ndërkombëtar dhe më vonë u ekstraduan në Gjermani. /enver gashi/