Kadriu: Skenari VMRO-BDI nxjerr jashtë skene Komitetin

Ranë maskat se kujt nuk i konvenon që Komiteti për marrëdhënie ndëretnike të debllokohet dhe të realizojë detyrat e veta kushtetuese konform Marrëveshjes Kornizë së Ohrit dhe Amendamentit kushtetues XII, tha Koordinatorja e Grupit Parlamentar të Demokracisë së Re, Flora Kadriu. “DR e ka shumë të qartë se pse partitë maqedonase nuk dëshirojnë të debatojnë në Parlament për projektin ‘Shkupi 2014’, për mësimin e maqedonishtes nga klasa e parë, për mos lëshimin e pasaportave në dygjuhësi, për ndryshimin e nënshtetësisë nga ‘R. së Maqedonisë’ në ‘Maqedonase’, mirëpo është e pakuptueshme që një parti sikur BDI-ja, e cila thirret në votat dhe legjitimitetin e shqiptarëve, të mos jetë e interesuar të pranojë iniciativën tonë për de bllokimin e Komitetit për marrëdhënie ndëretnike, organ i cili duhet të parandalojë çdo vendim, projekt ose ligj diskriminues ndaj shqiptarëve”, tha Kadriu. Sipas saj pas bojkotit të Komitetit fshihet skenar i përgatitur nga shumica parlamentare VMRO-DPMNE dhe BDI, me qëllim që ky Komitet të dalë jashtë funksionimit, edhe pse duhet t’i mbrojë interesat e bashkësive etnike jo shumicë në vend.