Instanca e dytë e refuzon kërkesën e familjes Zogaj

Gjykata austriake e azilit, e ka refuzuar kërkesën e Arigona Zogajt, nënës së saj dhe tre fëmijëve të tjerë të kësaj familje, informon e përditshmja austriake "Der Standard". Gjatë ditës së mërkurë, në kutinë postare ata kanë pranuar katër përgjigje negative.　Familjes kosovare të strehuar në Frankenburg të Austrisë, tashmë i mbetet vetëm edhe Gjykata Kushtetuese për tu ankuar. Katër muaj e kanë shqyrtuar gjykatësit ankesën e familjes Zogaj. Ata e kanë argumentuar vendimin e tyre me faktin se sëmurja psikike e nënës është e trajtueshme edhe në Kosovë. Se familja është shumë mirë e integruar në Austri, ata nuk e kanë marrë parasysh këtë. Të përkujtojmë se gjatë nëntorit të kaluar, avokati i familjes Helmut Blum kishte parashtruar ankesë ndaj vendimit të instancës së parë. Ekspertët mjekësorë kanë deklaruar se edhe në Kosovë ekzistojnë përkujdesje të mjaftueshme psikike.