Ahmeti takon Cërvenkovskin për ta frikësuar Gruevskin

Kriza mes partnerëve qeveritarë duket se po thellohet. Në mungesë të një takimi me kryeministrin Nikola Gruevski, Ali Ahmeti të hënën pasdite realizoi një takim me kreun e partisë opozitare maqedonase, LSDM, Branko Crvenkovski për të diskutuar mbi temat e nxeta, siç janë raportet ndëretnike, situata e sigurisë dhe bllokimi i proceset eurointegruese.

"Nëse Gruevski akoma mendohet nëse duhet të takohet apo jo me Ahmetin, unë mendoj se takimet e këtilla janë të dobishme. Maqedonia në këtë periudhë ballafaqohet me problem të rënda , siç janë raportet ndëretnike, situate e sigurisë është e brishtë si dhe proceset eurointegruese janë të bllokuara. Grupe ekstreme radikale gjithmonë dhe gjithkund kanë ekzistuar, me rëndësi është që ato të izolohen dhe të mos marrin përkrahje nga qytetarët. Nëse do fitojnë përkrahje apo jo varet nga ambienti politik, nga raportet ndëretnike dhe këtë çështje nuk mund ta ta zgjidh policia, kjo mund të zgjidhet në rrafshin politik, para së gjithash nga Qeveria. Dhe kjo është ajo që ne insistojmë, pasi raportet ndëretnike janë shtylla e Maqedonisë" tha Cërvenkovski.

Kreu i BDI-së, Ali Ahmeti nga ana e tij tha se bëhet fjalë për një takim të rregullt. I pyetur nëse BDI do të braktis qeverinë nëse kryeministrin nuk pranon tre kërkesat e BDI-së, Ahmeti tha vendimin për këtë çështje mund ta marrin vetëm organet më të larta të partisë.

"Përderisa ne jemi këtu ka takime të grupe të punës në Qeverinë e Maqedonisë për gjetjen e zgjidhjeve për disa problem që shtrohen në këtë situatë" tha Ahmeti. Ai poashtu tha se ekziston një angazhim i madh për tejkalimin e problemit të emrit me Greqinë dhe zhbllokimin e proceseve eurointegruese. Ahmeti tha se nuk mendon për zgjedhje të parakohshme pasi sipas zgjedhje mund të ketë vetëm në situatë të jashtëzakonshme.