Shqiptarët të formojnë parlamentin e tyre

Fatmir Limani nga Kërçova që është kushëri i liderit të BDI-së, Ali Ahmeti publikisht është shprehur kundër politikës “integriste” të cilën e zhvillon BDI-ja tij, duke kërkuar që në Maqedoni të krijohen institucione paralele shtetërore. Gjatë një prononcimi për “Lajm”, Fatmir Limani, i cili është njëri prej personave të parë gjatë themelimit të Ushtrisë Çlirimtare Kombëtare (UÇK) dhe djali i dëshmorit të kombit Beqir Limani ka kërkuar nga Ahmeti që të jetë më syçelë dhe më i vendosur në bashkëqeverisjen me Gruevskin. “Faktori politik shqiptar të krijojë një parlament të tij. Deputetët të cilët janë aktualisht të marrin vendet e tyre, shqiptarët të bojkotojnë taksat dhe tatimet të cilat i paguajnë me qëllim që të vetëdijësojnë palën maqedonase se pa shqiptarët nuk ka ardhmëri, pasi ata janë faktor vendimmarrës në këtë vend”, tha Limani.
Ai së bashku me Fazli Veliun janë persona të afërm me Ali Ahmetin, që haptazi po shprehin pakënaqësinë për situatën aktuale. Së fundmi pasi kishte paralajmërime se Veliu do të largohet nga BDI-ja, Fatmir Limani ka mohuar edhe zërat se në rajonin e Kërçovës po operojnë grupe të armatosura. “Për momentin ekzistojnë spekulime se gjoja se ekzistojnë formacione, por të dhënat e mia flasin të kundërtën. Formacione të atilla nuk ka”, tha Limani, duke akuzuar shërbimet sekrete maqedonase se po përgatisin skenarë të ngjashme sikur për vrasjen e Harun Aliut. “A mos dëshirojnë shërbimet e ndryshme që të eliminojnë tërësisht grupin kryesor që themeloi UÇK-në. Ata vranë Qemal Shaqirin, Harun Aliun, Isa Likën etj., mos duan t’i vrasin edhe të tjerët”, pyet Limani.
Kushëriri i Ali Ahmetit ka treguar edhe për raportet me dajën e tij si dhe ka sqaruar sa cilat janë arsyet pse BDI nuk largohet nga qeveria. “Zhvillohen takimet në aspekt familjar, por ne bisedojmë edhe për çështjen kombëtare. Alia është një person që e bëri një luftë dhe për të gjitha ato marrëveshje në fjalë, ka një garanci nga faktori ndërkombëtar. Ai është i detyruar që t’i mbajë garancat edhe ndërkombëtare dhe dyta ai nuk dëshiron që faktori shqiptar të mbetet fajtorë për atë se maqedonasit nuk e zgjidhin çështjen e emrit me shtetin artificialisht të krijuar”, tha Limani.
Ditëve të fundit Fazliu Veliu së bashku me Fatmir Limanin kanë marrë pjesë në përvjetorin e rënies së familjes Zymberi nga Sllupçani dhe të Fadil Nimanit – Tigrit në Vaksincë të komunës së Likovës. Me këto veprime ata i kanë deklaruar shumë qartë Ahmetit se nuk pajtohen me politikën e tij. “BDI është subjekt i dështuar politik. Unë jam i papajtueshëm me të gjitha marrëveshjet që i kanë nënshkruar, i konsideroj si marrëveshje të turpit, përfshirë këtu edhe Marrëveshjen e Ohrit. Nuk jam pajtuar me politikën të bashkëqeverisjes me armiqtë”, tha Limani. 
Ai ka paralajmëruar politikëbërësit se nëse Maqedonisë i vendoset emri “Maqedonia Veriore” që është emër me pretendime territoriale të Greqisë, atëherë shqiptarët automatikisht do të kërkojnë emrin “Shqipëria Lindore”.

S’ka ikur koha e luftërave
“Tentativa për destabilizime të atilla mund të ekzistojnë. Sa më përket mua, koha e luftërave për shqiptarët nuk ka përfunduar, por kjo nuk nënkupton se unë jam anëtar i ndonjë grupi ose formacioni”, tha Fatmir Limani.