Sa më afër shkolla, aq më kualitativ mësimi

12 shkolla fillore  në Komunën e Tetovës janë ndarë në regjione, pra çdo regjion ka shkollën e saj. Por sa janë të vetëdijshëm prindërit për ti regjistruar fëmijët e tyre në shkollën më të afërt të cilën e kanë në lagjen e tyre, kjo është për të dëshiruar.
Kur bëhet regjistrimi i nxënësve për në klasën e parë nëpër  shkollat  fillore,  disa prindër  ia mësyjnë për ta regjistruar fëmijën e tyre në atë shkollë e cila  është në qendër të qytetit , apo njihet si shkolla më e vjetër në qytet.
“Po punojmë në atë drejtim me qëllim që nxënësit të mos fokusohen vetëm në njërën shkollë dhe shkolla tjetër të ketë numër më të vogël të nxënësve”, deklaroi pwr “Lajm”, udhëheqësi i Sektorit për Veprimtari publike në Komunën e Tetovës.
Halimi gjithashtu pohon faktin se sipas informatave nëpër shkolla  ka pasur ndonjë rast të tillë, kur prindi ka kërkuar që fëmijën ta regjistrojë në një shkollë  e cila nuk i përket atij regjioni ku banon.
“Prandaj për këtë arsye kemi informuar drejtoritë e shkollave  me kohë, me qëllim që në vitin  e ardhshëm  shkollor 2010/2011 të mos  kemi ngecje në këtë drejtim.
Se nëse  nuk respektohen rregullat ashtu siç duhet, atëherë  nëpër shkolla do të na paraqiten probleme të mëdha, për arsye se  në njërën shkollë do të ketë tepricë teknologjike të të punësuarve, ndërsa në shkollën tjetër ku ka dyndje të nxënëse do të ketë mungesë të arsimtarëve. Por jo vetëm kjo por do të kemi mungesë të hapësirave dhe nuk mund të kemi kualitetin e dëshiruar në arsim”,  deklaron Halimi.