Maqedonia shënon 19 vjetorin e pavarësisë

Në Maqedoni shënohet 19 vjetori i pavarësimit të vendit pas shpërbërjes së ish-republikave jugosllave. Autoritetet shtetërore kanë përgatitur ceremoni zyrtare dhe aktivitete festive me rastin e shënimit të kësaj feste shtetërore.
Kryetari i Parlamentit të Maqedonisë, Trajko Veljanovski mbrëmë organizoi një pritje solemne për krerët shtetëror, partitë politike, krerët fetarë, korin diplomatik dhe institucione tjera. Në këtë ceremoni nuk ishin të pranishëm asnjë nga liderët e partive politike shqiptare.

Më 8 shtator të vitit 1991 në Maqedoni u mbajt referendumi i pavarësisë, me ç`rast shumica e qytetarëve u deklaruan për pavarësimin e vendit nga ish-federata jugosllave.