Majko maqedonasve: Heshtni, e hapim dosjen e Shën Naumit!

Ish-kryeministri i Shqipërisë, Pandeli Majko ka përshëndetur marrëveshjen e arritur mes Prishtinës dhe Shkupit për shënimin e vijës kufitare, e cila ka prodhuar konflikte ndër vite në rajonin e Ballkanit. Pas “Ky akt përbën një nga momentet më të rëndësishme gjeopolitike të ndodhura kohët e fundit. Ky është një moment delikat aq më tepër kur Kosova në dhjetor pret të shfaqet në gjykatën ndërkombëtare të Hagës për sa i përket çështjes së sovranitetit dhe të njohjes së pavarësisë së saj edhe nga ligji ndërkombëtar”, tha mes tjerash Majko. Megjithatë ai ka përkujtuar opozitën maqedonase që të mbyll gojën pasi nuk kanë të drejtë të flasin për çështjen e kufijve sa i përket shqiptarëve. “Opozita ka detyrë të shfaqë dyshimet e veta në çdo rast, por mendoj se në marrëdhënie me shqiptarët askush nuk mund të vërë dyshime të natyrave kufitare. Imagjinoni çdo të ndodhte për shembull sikur Shqipëria të rihapte dosjen e Shën Naumit në Ohër apo natyra të ndryshme problemesh. Mendoj se këto gjëra i ka mbyllur historia e së kaluarës dhe mendoj që tanimë me vendimin e marrë nga parlamentet e të dy vendeve është hapur një kapitull shumë i rëndësishëm”, tha Majko. Ai ka folur edhe për Marrëveshjen e Ohrit, të cilën e ka cilësuar si një marrëveshje e pambyllur. “Të gjithë shqiptarët, qofshin në Kosovë, Shqipëri apo Maqedoni, janë duke pritur që ky hap i sapohedhur, i rëndësishëm gjeopolitik të shoqërohet me hapa të tjera”, tha Majko.

Ndryshe, ish-kryeministri i Shqipërisë gjatë viteve të luftës në Kosovë ka qenë njëri prej kritikuesve më të ashpër të politikës maqedonase ndaj shqiptarëve, duke propozuar që shqiptarët e Maqedonisë ta djegin në mes të Shkupit flamurin e këtij shteti pas problemeve me Enciklopedinë.